अदालगुरि जौमा फरायसालिनि फरायसाफोरनि धर्ना हाबाफारि।

 सोलोंथाइ बिफाना जौमा फरायसालिनि फरायसाफोरनि मुं थिसन्नायनि मुंआव गोबां रां लानायखौ बन्द खालामनाय आरो BPL कार्ड गोनां गोरबो नख'रनि फरायसाफोरनो रां लायाजासे फ्रियै मुं थिसन्नायनि राहा खालामना होनायनि दाबि दैखांनानै दिनै अदालगुरि जौमा फरायसालिनि फरायसा-फरायसुलिफोरखौ नै धन्टा धर्ना हाबाफारि लानाय नुनो मोन्नाय जादों। हाबाफारियाव बाहागो लानाय फरायसा-फरायसुलिफोरखौ आसाम सरकार हाइ हाइ! सोलोंथाइ मन्थ्रि ड. रुनुज पेगु ग'बेक, we want justice, no justice no rest, we want solution, बायदि स्लगानजों अदालगुरि जौमा फरायसालिनि लांगोनांखौ गोमसार होयो। आथिखालाव आसाम सरकारआ राज्योनि सोलोंथाइ बिथिंखौ जौगाखां होनो थाखाय गोबां बिथांखिफोर नाजावनानै फरायसाफोरनि मोजांनि थाखाय खामानि मावबाय थानायनि बाथ्रा फोसावनायनि समावनो बेबायदि फरायसा-फरायसुलिफोरखौ धर्ना होनानै सोमावसारनो गोनां जानाया मोनसे सोमोनांथाव नुथाय। दिनै खुद्रिनाय हाबाफारिखौ नुनायनि उनाव आसाम सरकारनि सोलोंथाइ मन्थ्रि ड. रनुज पेगु बिथांआ मा बिबुंथि एबा फिन्नाय होयो, बेखौ इउननि समावसो मोनथिनो हासिगोन।